Translate

Thursday, August 7, 2008

"Ops Bersepadu" Kio

Saviavi agensi mongunguasa nokotounda no id boogizan kouhanan om puu montok monoodo “Operasi Bersepadu” montok monguhan Modiidikot Aiso Kasagaan (PATI) i papanaon id pogun diti id timpu au nodii ahaid.

Vozoon Montili Datuk Seri Musa Haji Aman minoboos, iti kopitanud miampai kotontuan i tinoodo do Komiti kikuasa Poimbida Kabinet kokomoi PATI i binuuuan di Kumoduvo Huguan Montili, Datuk Seri Mohd Najib Tun Razak kokomoi ahal dino di kavavagu diti.

“Kopolintaan mongintong tavavagat ahal PATI id Sabah… iti saasabap no do ahal dino nadadi pongintangan i sohinaid diti pinohobus do layat Sabah mazaa hahansanon ngaavi layat mantad po toi nazatan Puu Dewan Koundangan Pogun (Adun) om Puu Parlimen,” ka disido kahapas minomuuan mitingan Komiti kikuasa Kalaja Koumohigan Pogun id Wisma Innoprise id doiti, di koniab.

Kopiondot dino, ka disido, mongunsub isido saviavi agensi koumohigan miaga do pulis, Tinimungan Susumangod (ATM), Agensi Mongunguasa Maritim (APMM) miampai agensi tinimungan koumohigan suvai montok papavakas haang ngaavi ponguasaan miampai haang tosikap montok monguhan PATI id pogun diti.

Minoboos i Musa, isido sabaagi do Potunud Gerakan Pogun nokopiboos id suang mitingan di koniab kokomoi poguhudan om koponoinaan kalaja mamagakom om poguzazangan pisokodungan i todoon id pototongkop pogun daasom timpu au nodii ahaid.

Tumanud disido, pinoiho nogi isido do boogizan Kopolintaan Philippine minanaak kookunan montok misokodung montok monuhung id suang kalaja koponoimaan mahik layat dioho.

Ontok po nogi dino, ka disido, kopolintaan nga nakaakun montok papasaga tampat pakalajaan id pogun diti montok popolijisto pakalaja songkosuvazan dioho i aiso do suat kasagaan montok polijistohon om pakalaja id lahan kipotutan id pogun diti.

“Piokunan diti nopo nga id savat kopokionuan tampat pakalajaan… nakaakun tokou kokomoi kopokionuan dino montok manaak kosivatan kumaa dioho popolijisto pakakalaja dioho id lahan kipotutan, nga ontok timpu di miaga kalaja pointatap do potihombuson,” ka disido.

Poguhui diti, Piomungan Koisaan Sina Sabah (FCAS) mongunsub kopolintaan popohuntan kalaja tagaagazo kumaa PATI sohinaid do tohu vuhan po vagu, montok kaanu nodii tampat pakalajaan popolijisto pakalaja songkosuvazan dioho.

Polosiden dino, Datuk Sari Nuar minoboos, ahapas timpu kopoljistahan tohu vuhan dino kavasa nodii kopolintaan monoodo onu nopo kumaa PATI dino kaampai no dioho i au nokolijisto do tampat pakalajaan dioho.

Ontok po nogi dino, Musa i nogi Ponikoon Komiti kikuasa Koumohigan Pogun mamason layat kinoizonon mooi tomoimo mogovit suat kointutunan dioho sundung tu kumaa id nombo nopo mooi izioho au agakom id suang kalaja dino.

“Mokinsian zou layat pogun diti mooi do tumoonong om manaak sokodung tu kalaja diti tokukudi dati kakasou abaabazan dioho potitikid tadau,” ka disido.

Vozoon Montili minoboos, sabaagi layat Sabah i kitonggungan, tokou mositi monokodung om manaak sokodung poimponu kumaa boogizan kikuasa.

Ka disido, montok monguhan tuhun ginumuan mongintutun puu mongunguasa, izioho kibasaan pointantu om maapanau id lahan tinimungan ontok kalaja pisokodungan dino do todoon. Mantad dino, tuhun ginumuan mositi miingat-ingat om pisosoou no nung oikatan izioho do tuhun misosonguhun i kuminam maganu kosivatan ontok kalaja diti papanaon. Kopiondot dino, ka disido, haang tokodou onuon kumaa dioho i monoodo dino. Ontok po nogi dino, saasabap no do kalaja diti popoompit kopotutan pogun, mokianu isido sokodung saviavi boogizan magaanu abal mooi do luputan sinuan om luputan kigambal kokomoi kalaja pisokodungan dino todoon miampai poimponu tonggungan.

Iti ka disido, montok modihin nuununu kokitanan talaat om totondos au avasi kumaa kopolintaan om pogun diti.

Minoboos i Musa, sabaagi layat Malaysia i guminavo pogun, tokou mositi monokodung pongkimamaan ngaavi tabaakas kopolintaan om au toomod manaak hivang om kosivatan kumaa magaganu abal dahabus i kuminam papalaat kointutunan pogun om kopolintaan.

Ontok po nogi dino, manaak isido jominan do monuhuk tokou kogunaan ngaavi mongingintong kopotutan ngaavi tuhun… id suang ponguasaan diti, au tokou momoguno siniou.

“Mongkimamaa tokou montok modihin dino suvai ko id suang koozuzuvo di tootopot kopononsog… id suang ponguasaan undang-undang tokou mositi kumodou, nuununu haang i onuon mositi tumanud kalalahano pibaasan pogun,” ka disido.

No comments: